Aranguren Ibarreko Udala

Korrika bi urtean behin AEK-k antolatzen duen errelebo-lasterketa erraldoia da. Lehenengo Korrika 1980. urtean egin zen eta aurtengoa, pandemia dela eta, urte bete berandu iritsi dena, 22. Korrika izanen da. Hamaika egunetan zehar Korrikak berriz ere 2.000 kilometro baino gehiago ibiliko ditu euskararen alde. Adin guztietako parte hartzaile ezberdinak, gelditu gabe, egun eta gauez, eskuz esku lekukoa pasatzen ibiliko dira. Lekuko horrek barnean lasterketa amaieran euskaldun ezagunen batek irakurtzen duen mezu bat izaten du, ordura arte sekretuan mantentzen den mezua.

Korrikaren hasierako helburua euskaltegien (helduen euskararen ikaskuntzarako zentroak) eguneroko lana indartzeko dirua biltzea izan zen. Gaur egun, helburu hori ere betetzen du, baina batez ere euskararen aldeko kontzientzia suspertzeko jarduera alaia eta anitza delako da garrantzitsua.

22.Korrika martxoaren 31an Amurrion hasi eta apirilaren 10ean bukatuko da, Donostian.

Hizkuntza bat hitzekin osatzen da, baina ekimenek eraikitzen dute hizkuntza baten komunitatea. Euskarak aurrera egin nahi badu, euskaldun (pro)aktiboak behar ditu, konbentzimendutik ekintzara, praktikara, jauzi egingo dutenak.

Hau da 22. Korrikaren abestia:

Lasterketan parte hartuz:

• Ibarretik pasatzen denean, apirilaren 2an, KORRIKAn parte hartuz.
• 22. KORRIKAren hasieran, martxoaren 31an Amurrion, eta bukaeran, apirilaren 10ean Donostian, parte hartuz.

KORRIKA finantziatuz:

• KORRIKA laguntzailea eginez (https://korrika.eus/es/laguntzailea-es )
• 22. KORRIKAko materiala erosiz:
  • Souvenirs Estafeta, Estafeta k/ 47. Iruña
  • Online denda (https://www.denda.korrika.eus/es/ )

• KORRIKAko petoa AEKko euskaltegietan, KORRIKAko dendetan, Taxoareko Korrika Txikian edo KORRIKA Ibarretik pasatzen den egunean erosiz.
• Martxoaren 12an Arangurenen eginen den Bertso Bazkarian parte hartuz.
• Martxoaren 27an Taxoaren eginen den KORRIKA TXIKIAn eta ondorengo jardueretan parte hartuz.
• Familian, elkartekideekin edo lagun artean ekarpena egin eta lekukoa eramanez.

Aranguren Ibarreko Udalak 20 urte baino gehiago daramazki, 2001etik, KORRIKA Ibarretik pasatzen deneko kilometro bat erosi, Ibarreko herritar guztien izenean ekarpena egin eta lekukoa eramanez.

Zabalpena sustatuz:

• KORRIKAren webgunera sartu zaitezke (www.KORRIKA. eus) eta sare sozialetan parte hartu.
• KORRIKA KULTURALA dela eta antolatzen diren jardueretan parte hartu dezakezu.

22.Korrika apirilaren 2an pasako da Mutiloatik. Udalak eta, Ibarreko talde eta elkarte ezberdinen ekarpenaz, Irulegi Euskara Taldeak kilometro bana erosiko dute. Bi kilometro horiek bata bestearen atzetik doaz eta horietan parte hartzeko gonbitea luzatzen dizuegu.

Lehenengo kilometroa, 522.a, Irulegirena izango da eta Mendillorri eta Mugartea tarteko errotondan hasiko da, bide gorrian.

Bigarrena izango da Aranguren Ibarreko Udalaren kilometroa, 523.a, kilometro hau Iturbide eta San Saturnino kaleen gurutzean hasiko da (Mutiloa elkarte gastronomikoa dagoen lekuan).

• Apirilak 2, larunbata
• 11:25 (20 minutu lehenago egotea komeni da)

Atal honetan ikusi daitezke aurreko Korrikak Ibarretik pasatzean grabatutako bideoak

Ibarreko Korrika Txikia 2009. urtetik egiten da. Helburua Korrika handiko kilometroa finantzatzea du; baina batez ere, Korrika aurreko giroa berotzea eta Ibarreko elkarte eta talde ezberdinek euskararekiko duten inplikazioa eta motibazioa handitzea. Orain arte Ibarreko Korrika Txikia Taxoaren egin da.

Hemen dituzu aurreko urteetako Ibarreko Korrika Txikien zenbait bideo: