Eskuratu zure ‘Joan eta etorri’ zerbitzuko txartela Aranguren Ibarreko jaietarako!
Txartelen salmenta zerbitzua hasi aurreko astelehenean irekiko da, 07:30ean, Aranguren Ibarrean erroldatutako pertsonentzat.
Ibarreko herrietako jaietan joan-etorriak errazteko eta mugikortasun seguruagoa sustatzeko helburuarekin, Aranguren Ibarreko Udalak ‘Joan eta etorri’ zerbitzua jarri du berriro martxan uda honetan.
Txartelen salmenta herri bakoitzeko jaiak hasi aurreko astelehenean hasiko da, 07:30etik aurrera, eta Aranguren Ibarrean erroldatutako pertsonentzat soilik izango da osteguneko 11:00ak arte.
Une horretatik aurrera, eta oraindik plaza libreak geratzen baldin badira, erroldatuta ez dauden pertsonek ere ostegunean eskuratu ahal izango dituzte txartelak, 11:00etatik 13:00etara. Horretarako, 31192 Gaztegunera joan beharko dute aurrez aurre, eta NANa aurkeztu beharko dute txartela jasotzeko, plaza guztiak bete arte.
Horrela, hasiera batean, udalerrian erroldatutako pertsonek izango dute zerbitzua erabiltzeko lehentasuna, eta, ondoren, plaza libreak geratzen badira, salmenta gainerako interesdunei zabalduko zaie.
‘Joan eta etorri’ zerbitzua
‘Joan eta etorri’ zerbitzuaren helburu nagusia alkoholaren eta beste droga batzuen kontsumoaren ondoriozko trafiko-istripuak prebenitzea da, eta 16 eta 30 urte bitarteko gazteei zuzenduta dago.
Aranguren Ibarreko Udalak adingabeei gogorarazi nahi die zerbitzua erabili ahal izateko, aitaren, amaren edo legezko tutorearen baimena behar bezala beteta aurkeztu beharko dutela, NANarekin edo AIZarekin batera. Dokumentazioa aurrez aurre aurkeztu ahal izango da 31192 Gaztegunean edo posta elektronikoaren bidez (juventud@aranguren.es).
Txartelak eskuratzeko, interesdunek ‘Joan eta etorri’ aplikazioan sartu beharko dute. Joan-etorriko txartelen prezioa 4 eurokoa izango da Aranguren Ibarreko herrietako jaietarako, eta 8 eurokoa kanpoko jaietarako.
Kontsulta ezazu ‘Joan eta etorri’ zerbitzuari eta ordutegiei buruzko informazio guztia hemen klik eginez.