Irulegi I.Pan Ibarreko haurrek 3 urtetik aurrera D EREDUAn ikasteko aukera dute. Eredu honetan euskarazko murgiltze goiztiarra egiten da. Haurrek jokoaren bidez eta euskara erabiliz garatzen dituzte beren euskara gaitasunak, modu natural batean eta hizkuntzaren garapen eta eboluzioarekin batera.
Adituek ikaskuntza goiztiarra bertako hizkuntzekin hastea gomendatzen dute, gure kasuan euskararekin, hurbilagoak direlako eta enpatia handiagoa eta erabiltzeko baliabide gehiago eskaintzen dituztelako.
Familian euskararekin harreman zuzenik ez duten ikasleek, Iruña eta Iruñerriaren kasuan ikasleen %90, gaztelaniazko esperientziak eta euskarazko ekoizpen berriak integratzen dituzte, hizkuntza-gaitasuna bakarra baita. Hori argi geratzen da idazketa-lanaren ikaskuntza-prozesuan. Ikasleek euskaraz eta gaztelaniaz irakurtzen eta idazten ikasten dute aldi berean, eta ez dira bi ikaskuntza-prozesu behar. Horrela, euskararen ezagutzak gaztelaniarena indartzen du eta alderantziz. Hizkuntzen arteko gaitasunen transferentziak biak aberasten baititu.
Eredu honetako ikasleek, derrigorrezko irakaskuntza bukatzerakoan, “erabiltzaile gaitua, maila aurreratua” izeneko euskara maila lortzen dute (B2, Europako Erreferentzia-Marko Bateratua), eredu honetan bakarrik berma daitekeena: hizketaldi luzeak ulertzea, gaia konplexua bada ere; hizketaldietan parte hartzea, jatorrizko hiztunekin komunikatzeko nahiko jariotasunez eta bat-batekotasunez; testu argiak eta zehatzak idaztea eta unibertsitatean euskaraz ikasteko aukera izatea. Azaldutako maila eskolako lanari esker lortzen da, baita, lan hori indartzeko, euskararen erabilera gelan eta aisialdian sustatzeko programei esker ere: bertsolaritza, erabilera informalerako tailerrak, hizketaldietarako laguntzak, egonaldiak herri euskaldunetan, udalekuak, ikastetxeetan egiten diren jarduerak, hitzaldiak, etab. Baita beste erakunde publikoek eskaintzen dituzten bestelako jarduerak ere (Udalak, Gobernua…): musika eskolak, ludotekak, aisialdi taldeak, ziklo ezberdinak…
Eredu honetan atzerriko hizkuntzen ezagutza ere integratzen da. D ereduan ingelesa 4 urtetatik aurrera astean bost saioz lantzen da eta derrigorrezko irakaskuntza bukatzerakoan, ikasleek “erabiltzaile autonomoa, atalase-maila” izeneko maila lortzen dute (B1, Europako Erreferentzia-Marko Bateratua). Ingelesak ikasleen gaitasuna indartzen du eta, aldi berean, eredu honetako ikasleek abantaila batzuk dituzte ikasteko, bi hizkuntza ezagutzean haien motibazioa handiagoa baita.
Oro har, otsaila eta martxoa bitartean izaten da aurrematrikulazioa. Prozedurari buruzko informazio gehiago nahi baduzu, ikastetxearen webgunera jo dezakezu: (enlace: https://cpirulegi.educacion.navarra.es/web/es/prematriculacion-curso-21-22/).
