Bihar, maiatzaren 21ean, osteguna, Nafarroa Ezagutu sareko jasangarritasun eta irisgarritasuneko formakuntzan izena emateko azken eguna
Ikastaroa doakoa da eta ekaina eta uztaila bitartean egingo da, Nafarroako natura- eta ondare-espazioen kudeaketa inklusiboagoa sustatzeko helburuarekin.
Nafarroa Ezagutu Sarea / Red Explora Navarra -k jasangarritasuna eta irisgarritasuna natura- eta ondare-espazioen kudeaketan txertatzera bideratutako doako formakuntza berri bat jarri du abian. Horrela, ikastaroaren helburua elkarteko kide diren natura- eta espazio berezien kudeaketa jasangarri eta irisgarria sustatzea da.
Ikastaroak 45 orduko iraupena izango du eta 2026ko ekainaren 1etik uztailaren 2ra egingo da, astelehen, astearte eta ostegunetan, 17:00etatik 20:00etara, Landa Garapeneko eta Ingurumeneko Departamentuko areto nagusian.
Izen-ematea bihar arte, maiatzaren 21era arte, egongo da zabalik, eta honako formulario honen bidez egin daiteke: https://forms.office.com/e/srwbkHKDVN
Jasangarritasun eta irisgarritasuneko formakuntza
Formakuntza hau espazio horien kudeaketan jasangarritasun eta irisgarritasun irizpideak txertatzera bideratuta dago, Nafarroa Ezagutu Sarearen barruan eredu inklusiboagoetara aurrera egiteko helburuarekin. Horretarako, programak eduki teknikoak eta praktikoak uztartzen ditu, besteak beste, jasangarritasunaren eta irisgarritasunaren oinarriak, lurraldearen diagnostikoa, komunikazioa eta parte-hartzea, eta proiektu irisgarrien garapena lantzeko.
Gainera, parte-hartzaileek aukera izango dute ondoren espazio horietan jarduerak garatzeko kontratazio aukeretan parte hartzeko, horrek formakuntzaren izaera praktikoa indartzen baitu.
Ikastaroa ingurumenarekin, landa eremuarekin edo dinamizazio soziokulturalarekin lotura edo interesa duten pertsonei zuzenduta dago, eta bereziki motibazioa, aurretiazko prestakuntza eta arlo honetan lan egiteko prestasuna baloratuko dira. Halaber, desgaitasuna duten pertsonentzat bost plaza gordeko dira, aukera-berdintasuna sustatzeko.
Nafarroa Ezagutu Sarea
Nafarroa Ezagutu Sarea / Red Explora Navarra naturaguneen, espazio berezien eta ibilbide publikoen 90 kudeatzaile baino gehiago biltzen dituen elkarte bat da. Kudeatzaile horien artean daude, Nafarroako Gobernuaz gainera, tokian tokiko erakundeak, toki-ekintzarako taldeak, turismo-partzuergoak eta irabazi-asmorik gabeko elkarteak.
Nafarroa Ezagutu Sarea lankidetzarako, ezaupideak trukatzeko eta sarean lan egiteko gune gisa sortu zen, Nafarroako Naturaguneen eta Espazio Berezien Kudeatzaileen Sarearen lehen topaketa egin ondoren.
Testuinguru horretan, Aranguren Ibarreko Udalak herritarrak prestakuntza honetan izena ematera animatzen ditu, aukera paregabea baita lurraldearen garapen jasangarri eta inklusiboaren arloan funtsezko ezagutzak eta gaitasunak eskuratzeko.
Kontsulta ezazu informazio guztia hemen klik eginez.
