Bizi ezazu emakumezkoen esku pilotako VIII. San Fermin Txapelketako partida bat Mutiloan!
Partida ekainaren 12an, ostiralean, izango da Udal Kiroldegiko frontoian. Sarrera doakoa izango da edukiera bete arte, eta girotzea ‘Irulegi Trikitixa Eskola’r-en eskutik izango da.
2026ko ekainaren 12an, ostirala, Aranguren Ibarreko Udal Kiroldegiko frontoia, hirugarren urtez jarraian, Emakume Master Cup zirkuituaren barruan antolatutako emakumezkoen esku pilota profesionaleko VIII. San Fermin Txapelketako partidetako baten agertoki bihurtuko da.
19:00etan hasiko den kirol-hitzordu honek, edukiera bete arte doako sarrera izango duena, gaur egungo pilotaririk onenetako batzuk bilduko ditu. Helburua tradizionalki gizonezkoen eremutzat hartu diren kiroletan emakumeen presentzia ikusaraztea eta indartzea da, hala nola pilotan. Horrela, ekitaldiaren xedea emakumezko erreferenteak sustatzea eta emakumeen eta gizonen arteko benetako berdintasuna bultzatzea da, emakumeek presentzia, aitortza eta ikusgarritasun publikoa izango duten guneak sortuz.
Ekain honetan, bi taldetan banatutako zortzi bikotek Euskal Herriko hainbat frontoi zeharkatuko dituzte txapelketako final handira iristeko lehian. Finala 2026ko uztailaren 11n jokatuko da Iruñeko Labrit frontoian, San Ferminetako jaiekin batera. Aranguren Ibarrean jokatuko den partida finalerako bide horren parte izango da, Nafarroako hiriburura iritsi aurretik txapelketako geldialdi garrantzitsuenetako bat izanik.
Partidaren aurreko orduan, Ibarreko herritarrek emakumezko pilotari gazteen arteko esku pilota partida batez gozatzeko aukera izango dute. Horrela, belaunaldi-erreleboa eta tokiko harrobia sustatzeko apustua egingo da. Gainera, frontoian palan aritzen ziren Ibarreko emakumeei omenaldia egingo zaie, kirol-esparru honetan bidea ireki zuten emakumeen ibilbidea ikusarazi eta aitortzeko helburuarekin.
Ostiral arratsaldeko giroa ‘Irulegi Trikitixa Eskola’-ren eskutik etorriko da; trikitixa eta pandero doinuekin girotuko baitute itxaronaldia.
Kirol-ekitaldi hau Aranguren Ibarreko Udalaren Berdintasunerako I. Ekintza Planaren barruan kokatzen da. Plan horren helburua kirolaren esparruan emakumeen presentzia sustatzea eta sektore honetan emakumeek aukera-berdintasuna izan dezaten bultzatzea da. Era berean, goi-mailako lehiaketetan pilotari emakumeak ikusarazteak ez du soilik erreferente gisa duten presentzia indartzen; historikoki gutxietsia izan den diziplina batean erakutsi duten talentua eta ahalegina sozialki aitortzea ere badakar.
Berdintasun Zerbitzutik Aranguren Ibarreko herritar guztiak animatzen ditugu frontoira hurbil daitezen, kirol-hitzordu honetaz gozatu eta gure pilotariei babesa emateko.
